الرسالة دي جاتلي على الواتس من مدرس حصة.. وسبتها زي ما هي تقريبًا لأن الكلام فيها يوجع أي حد عنده ضمير." مضمون الرساله كتالي
"الرسالة دي جاتلي على الواتس من مدرس حصة.. وسبتها زي ما هي تقريبًا لأن الكلام فيها يوجع أي حد عنده ضمير."
مضمون الرساله كتالي
"مدرس كيمياء، عمره 45 سنة، خريج تربية من سنة 2002، وأب لـ3 أولاد في مراحل تعليمية مختلفة.
من 3 سنين وهو شغال بنظام الحصة. سنة اتقدم واترفض بدون أي سبب. السنة اللي بعدها اشتغل مدرس كيمياء، 10 حصص في الأسبوع، والحصة بـ20 جنيه! أيوة 20 جنيه.. وبعد الخصومات كانت بتنزل أكتر.
بعدها زودوا النصاب لـ16 حصة، واتحاسبوا على 15 بس. وآخر السنة اتفاجئوا إن كل مدرسين الحصة تقريبًا اتقبضوا مبلغ واحد مهما كان عدد الحصص اللي اشتغلوها!
يعني اللي شغال 10 زي اللي شغال 20؟
هو الاجتهاد بقى عقوبته المساواة؟
ولا الحسابات ماشية بمنطق "راضوا الناس وخلاص"؟
السنة اللي بعدها النصاب زاد لـ20 حصة أسبوعيًا.
والسنة الحالية الوزير أعلن إن الحصة بـ50 جنيه.
طيب جميل...
أمال ليه يقبضوا صافي 31 جنيه و40 قرش للحصة؟
فين الـ50 جنيه؟
راحوا فين؟
وإيه الاستقطاعات دي؟
وهما بيستفيدوا منها في إيه أصلًا؟
المعلم مطلوب منه يحضر من طابور الصباح لحد آخر اليوم.
إشراف يومي.
مراقبة امتحانات.
تصحيح.تقييمات.
رصد درجات.
اجتماعات.متابعة.
تحضير دروس.
يعني بيقوم بكل واجبات المعلم الرسمي تقريبًا...
لكن وقت المرتب يبقى "معلم حصة"!
طب هو المطلوب يسدوا العجز ولا يعيشوا؟
إزاي أب عنده 3 أولاد ومسؤوليات بيت كاملة يعيش بـ2040 جنيه في الشهر؟
2040 جنيه!
هو المسؤول اللي حط الرقم ده جرب يشتري بيهم احتياجات بيت أسبوع واحد؟
جرب يدفع بيهم إيجار؟
جرب يشتري بيهم كتب؟
جرب يجيب بيهم درس لابنه؟
ولا الأرقام دي بتتحسب في المكاتب المكيفة بس؟
والأغرب...
لما نيجي لمسابقة التعيين يلاقوا شروط واختبارات وكشف هيئة ووزن مثالي واختبارات بدنية!
استنى بس...
هما رايحين يقدموا في عروض لياقه بدنيه
ولا رايحين يدرّسوا كيمياء وفيزياء ورياضيات للطلبة؟
هو المدرس هيشرح المنهج ولا هيجري 100 متر حواجز؟
بعد كل ده...
ينتهي العام الدراسي، ويتقفل باب الرزق 3 شهور إجازة بدون أي دخل.
مرتب أبريل لحد دلوقتي ما اتصرفش.
يعني المرتب أصلاً ضعيف...
وكمان متأخر!
بأي منطق؟
وبأي عدالة؟
وبأي احترام لمهنة المفروض إنها بتبني أجيال؟
المعلم اللي بتطلبوا منه يربي ويعلم ويكون قدوة...
هو نفسه محتاج حد يسأله: عايش إزاي؟
رسالة صاحبها بيقول في آخرها:
"مش بطلب رفاهية... بطلب أجر عادل يتدفع في معاده. بطلب عقد يحفظ حقي. بطلب حياة كريمة لأسرتي."
ويبقى السؤال للمسؤولين:
لو معلم بقاله أكتر من 20 سنة متخرج، وعنده 45 سنة، وشغال بكل الواجبات دي، ومش عارف يوفر احتياجات بيته الأساسية...
يبقى مين اللي محتاج يتراجع؟
المعلم؟
ولا المنظومة كلها؟
#أنقذوا_معلم_الحصة
#حق_المعلم
#التعليم_في_خطر
تعليقات
إرسال تعليق