ويتوالى الكذب :تحدث الوزير امس مع عمرو اديب عن الأمتحان التجريبى وللأسف كالعادة رمى الفشل والأستهتار على الطالب

ويتوالى الكذب :

تحدث الوزير امس مع عمرو اديب عن الأمتحان التجريبى وللأسف كالعادة رمى الفشل والأستهتار  على الطالب واصبح شعار الوزير اكذب ثم اكذب ثم اكذب حتى تصدق ما كذبت وهذا بعض ماقاله:

١. الوزير⬅️ ٢٥%من الطلبة لم يهتموا بدخول الامتحانات اليوم و١٠٠ الف طالب دخلوا الأمتحان ولم يهتموا ان يكون معاهم الأسم وكلمة السر او يحدثوا التابلت ومفيش حاجة اسمها سيستم يقع لأن الأمتحان على الشبكة الداخلية . ياسيادة الوزير يبدوا انك نسيت ان هناك مدارس كاملة لم يفتح معها الأمتحان فى الثلاث مواد وهناك مدارس فتح فى بعض المواد دون الأخرى وهنا نتسأل هل المدرسة الكاملة مفيش فيها طالب يوحد ربنا افتكر الأسم وكلمة السر طيب بالنسبة للمدارس اللى فتحت فى بعض المواد دون الأخرى ما الطالب اللى دخل الأسم وكلمة السر فى المواد التى فتحت والله العظيم هو نفس الطالب اللى دخل نفس الاسم وكلمة السر فى المواد الأخرى ومافتحش الامتحان معاه يبقى العيب مش فى الطالب والدليل مدارس كاملة ومنها مدرسة ابنى عملوا محاضر لجميع الطلبة بأن الأمتحان لم يفتح 

٢. الوزير ⬅️ الطلاب اول مرة تكتشف نوعية الأسئلة على الرغم انهم اتدربوا عليها من ٣ سنين وده معناه ان الطالب فى اولى وتانية ثانوى مابصوش على الأمتحانات خالص . وانا برد عليك واقولك فين التدريب ده يافندم . انت مصدق نفسك ان كان فيه تدريب وان كان فيه مدرس اساسا بيدخل الفصول وبيشرح . ثم ان لسانا نشف من اول الدراسة واحنا بننادى بوجود نماذج استرشادية للطلبة تتدرب عليها تقوم سيادتك تعملهم امتحان قبلها بشهر وامتحانات تعجيزية اجمع عليها المدرسين قبل الطلبة على صعوبتها فين الوقت اللى الطلبة هتتدرب على نوعية الأسئلة الخارقة دى 

٣. الوزير⬅️ الطلبة اللى ماحضرتش الامتحان تيجى ويهتموا بالأسم والباسوورد فى الامتحانات التجريبية القادمة . وانا بقولك الطلبة هتيجى ومعاها الباسوورد والأسم وبرضوا السيستم هيقع لأن النظام مبنى على هشاشة ومابنى على باطل فهو باطل  

٤. الوزير⬅️ الناس اللى قلقانة بنقولهم الأمتحان النهائي هيكون مختلف فى تأمينة وفى البدائل المطروحة تقنيا عن الامتحانات التجريبية لأن التأمين مكلف . السؤال هنا احنا هنفضل تحت رحمة النظام هينجح ولا لاء والسيستم هيشتغل ولا لاء وفيه غش ولا لاء ليوم الأمتحان . طيب انا بقولك ان الأمتحان الالكترونى هيفتح مجالات للتهكير والغش مش هتقدر توقفها هنعمل ايه وقتها 

٥. الوزير⬅️ هننشر الاسئلة واجاباتها هذا الأسبوع لأن الهدف من الأمتحانات هو التدريب  وسيبوا الاولاد تذاكر . بجد والله هو الهدف كان التدريب على الأمتحانات بجد كتر خيرك انك بتدربهم على شكل الاسئلة قبل الأمتحانات بشهر فى نظام غامض غير محدد الملامح . ثم هتدربهم على امتحانات تعجيزية ٤٠ سؤال فى ساعة كل سؤال لو الطالب قرأه كويس وفهم مابين السطور محتاج ربع ساعة . وماذا عن المواد العلمية ٢٠ سؤال فى نصف ساعة . انت سيادتك بتهرج أما طالب مش مدرب وبيجتهد مع نفسه ومليون كتاب خارجى والمدرسين بنفسهم مش عارفين شكل الأسئلة هتبقى ازاى والجميع بيهبد وتقوم تجيب للطالب امتحان خارج المجرة بعدد الأسئلة الكتيرة دى وفى زمن قليل يبقى ده تهريج وعدم احترام للطالب والنية مسبقة لتحطيمه وعدم دخوله الجامعة . 

٦. الوزير⬅️١٠٠ الف طالب هيمتحنوا ورقيا وهم المنازل والراسبين والمؤجلين ولكن على النظام الجديد . وهنا مربط الفرس والمقصد من ان تجعل البعض يمتحن الكترونيا فى ظل سيستم ونظام فاشل والبعض الأخر يمتحن ورقيا ومعظمهم مقفلين المواد ونسبة نجاحهم بمجاميع مرتفعة وعند ظهور النتيجة هتقول ان نسبة النجاح مرتفعة وان النظام نجح بنجاح سابق والمجاميع مرتفعة طبقا لمجموع الدفعة القديمة  ويتساوى الدفعتين فى التنسيق بين دفعة  قديمة معظم الطلبة  حاصلين على اكثر من  ٩٥% ومعظمهم هيدخلوا كليات القمة ودفعة جديدة اللى الطالب فى المركز الاول لو جاب ٨٠ %يبقى كرامة ولو قدر يلحق كلية من اساسه يبقى يبوس ايده . خطة فى منتهى الذكاء لنجاح نظامك .

ياسيادة الوزير بدل من الكذب ورمى كل المصائب على الطالب اطلع واعترف بفشلك وفشل تجربتك . اطلع وحاول تكون منصف بين الطلبة وبين الدفعتين . اقسم بالله هتتسأل امام ربنا على ضياعك دفعة التابلت وتحطيمهم . اولياء الأمور وابنائهم هيختصموك امام الله عز وجل ومهما تخطط فأبنائنا لهم الله وحده ولن يجدوا الا ماقد قسمه الله لهم وان شاء الله هيكون خير لأنهم صبروا واتحملوا ٣ سنين من الهدم والفشل والضياع وانت قاعد بتتفرج عليهم وضميرك مرتاح ومع ذلك بيحاولوا وبيكافحوا وبيعانوا وشاربين المر هما واهلهم  عشان ينجحوا فى ظل منظومتك التعجيزية  وحسبي الله ونعم الوكيل فوضنا الأمر لله قادر ينصف اولادنا