انا المدمن
سمعت ان الحشيش حلو و بيبسط جربته و دي كانت البدايه
حسيت بمتعه غير طبيعيه كنت طاير من السعاده قلبي كان هيقف من كتر الضحك و تنميله كده محسساني براحه في جسمي كله و يوميها نمت نوم عمري ما نمته في حياتي نسيت كل خنقه و قرف و ضيق حسيت بيهم في يوم
و طبعا محدش يكره الانبساط بقيت ادور عليه كل اسبوع كل كام يوم و في الاخر بقت كل يوم و كل شويه
و الحشيش بقا عادي حد قالي جرب الحبوب (الترمادول ) و زي ما تدرجت في شرب الحشيش
وصلت للاخر في الترمادول و الحبوب بانواعها و كنت بعمل كوكتيلات و تركيبات
كنت باخد بالخمسين حبايه في اليوم
كتير مش معقول طبعا
تعبت من البرشام و اتداينت و اتسحلت ده علي كده البودره ( الهيروين ) ارخص
دخلت في البودره
و حبت عاليها واطيها خربت خالص الدنيا
كنت ناصح
ابتدت بنفسين حشيش و انتهت بكارثه
كل حاجه ليها قيمه في حياتي ضاعت او بعدت عني او خسرتها
و الفكره من الموضوع اني كنت عايز اتبسط مش اكتر والله
ربنا كتبلي ان افضل عايش و اعرف طريق التبطيل
اصحابي كتير مالحقوش و عزيت فيهم
بفتكرهم كل يوم بفتكر ضحكنا و خروجاتنا و حكايتنا
و افتكر باردو المخدرات و اللي عملته فينا
كانت لمانا عشان تموتنا
عمليه قتل جماعي
مش هسيب حد يموت
انا بطلت و اتعلمت ابطل ازاي و اساعد الناس تفضل مبطله ازاي
احمد يحيي
مدمن متعافي ٧ سنين و شهرين و ٢٢ يوم بفضل ربنا و ناس كتير ساعدتني اولهم امي و اخواتي
انا المدمن رقم ١
انا البطل
انا بنقذ حياه الناس من الموت
و مش هسكت و لا هبطل كتابه
و اللي هايقع في طريقي مش هسيبه
قد الدنيا و الدنيا مش قدي
و لو انطبقت السما عالارض مش هسكت
و لو النجوم طلعت في عز الضهر مش هسكت
انا المدمن
تعليقات
إرسال تعليق