كيف كانت تدار

حسني مبارك فى وقت من الأوقات كان متخانق مع القذافى وطلب من المخابرات يكلموا حد يعمل فيلم يتريق عليه..

صفوت الشريف (موافى) قال لمبارك مفيش غير الواد بتاع أغنية "لولاكى" اللى مكسرة الدنيا..دة شبهه خالص..

مبارك قال خلاص هاتوا ابن ال...يضحكنا على ابن ال...دة وشاور على صورة القذافى..

موافى بعت فعلا لرجالته يجيبوا على حميدة..

على جه على ملى وشه يقابل موافى بيه..

وبعد انتظار لساعات دخلوه يقابله..

موافى قابله بالاحضان..

بالحضن يا راجل..

اقعد..تشرب حاجة؟..بتدخن؟..

وبعد الاستقبال الكبير..

وش صفوت تحول للجدية: شوف يا واد يا على..البيه الكبير وشاور له على صورة مبارك عاوزك تعمل فيلم عن ابن ال...القذافي..

هو قال مفيش غيرك ينفع..هنعمل فيلم كوميدي وهتقبض قرشين حلوين والريس هيكرمك بنفسه..

على حميدة قام وقف وقال له: انا مليش فى السياسة يافندم..

صفوت اتنرفز وصرخ فيه: هو انت فاكرنا هنتحايل عليك يا ابن ال...دة أمر..

ومن الباشا الكبير بنفسه..يعني تسمع وتقول حاضر ونعم..

على قال له: أنا آسف يافندم دة انا مجرد مغنى وماأعرفش فى التمثيل..

صفوت ابتسم ابتسامة صفراء وقال له: جدع يلا...عجبتى..إطلع برة..

---

ومن بعدها الدنيا اتقلبت على على حميدة ..والضرايب جت تطالبه بخمسة مليون جنيه عن شريط لولاكى..

على قال لهم انا كل اللى حيلتي شقة على النيل كسبتها من شغلى كله..

الضرايب خدت إجراءاتها علشان تحبسه ومبقاش عنده حل غير انه يبيع الشقة تعب السنين..على باعها بالخمسة مليون ودفعها للضرايب..وبقى يبات فى عربيته الجيب قدام العمارة اللى فيها الشقة يتحسر عليها..

---

موافى مااكتفاش بكدة...بعد ما وصله ان على باع شقته..وصى كل المنتجين محدش يتعامل معاه..وحتى الملاهى اللى كان بيغني فيها أنهت تعاقدها معاه..

ومش بس كدة..

بعد ما عرضوا تقريره على صفوت..قال لهم عاوزه يتفضح وما يرفعش وشه تانى قدام أسياده..

ومفيش بعدها بأيام صدرت كل الجرايد ومجلة روزاليوسف تتحدث عن ضبط على حميدة فى وضع مخل مع طفل صبي ميكانيكي فى عربيته الجيب اللى كان بيبات فيها..

والعربية كمان اتصادرت واتحفظوا عليها..

===

حسنى مبارك مرة طلع يزعق فى مجلس الشعب وقال فى خطبته: الناس اللى زعلانة من أن البطيخ غلي(كان سعر البطيخ قد إرتفع بطريقة جنونية وقتها)..مانتوا اشتريتوا الشريط بأربعة جنيه ومحدش اشتكى (كان يقصد شريط لولاكى)

#علي_حميدة