أنتم إللى إستهترتوا بأرواح الناس من البداية متجوش تلزقوا بلاويكم في الغلابة ...
#الخلاصة ...
لما تطلعو بيانات غلط وتقولوا إن عدد المصابين13000
في شعب تعداده ١٠٠ مليون، لازم الناس تستهتر.
لما تقول إن اللواء مات علشان كان بيطهر الشوارع على الرغم إن أقل عيل في البلد عارف إن لواء الجيش مش هينزل أبداً مع عربيات الرش لازم الناس تستهتر.
لما تسيب (القطاع الخاص) بينهش في الناس وحقوقها وبيسرق مرتباتهم ورافض تطلع من ميزانية الدولة المنهوبة من قرن وتصرف على الشعب صاحب المال وسايب الناس مضطرة تنزل علشان تعيش، لازم الناس تستهتر.
لما تكتشف أول حالة كورونا يوم ١٤ فبراير وتتلكع في تأجيل المدارس والجامعات لمدة شهر كامل، لازم الناس تستهتر.
لما تبعتو وزيرة الصحة بتاعتنا تتصور في الصين مرة بكمامة ومرة من غير كمامة وتيجي تعمل مؤتمر صحفي بعدها ب ٢٤ ساعة من غير عزل ولا بتنجان، لازم الناس تستهتر.
لما تقول للغلبان أقعد في بيتك من غير ما تقول له هيدفع غاز وكهرباء ومياه وهيأكل عياله منين، لازم الناس تستهتر.
لما تخلو سعر التحليل ١٠٠٠ جنية في بلد ٥٠٪ منها تحت خط الفقر ومافيش عزل صحي بدون رعاية لازم الناس تستهتر.
لما تخبوا الأعداد الحقيقية للمصابين والوفيات والدكاترة نفسهم مش لاقيين رعاية عشان يرعوا الناس، لازم الناس تستهتر.
لما تقفلو الكنائس و المساجد وتمنع الصلاة وسايب المواصلات العامة والمترو اللي الناس بتبقى حاضنة فيه بعض حرفياً وسايب
الشوارع بزحمتها والطرق بتكسيرها ومخلي الناس فوق بعض في المصالح الحكومية لازم الناس تستهتر.
لما وزير التعليم العالي يطلع يقول التيرم زي ما هو ومش هيتأجل رغم إن أكبر جامعات والأولى في التصنيف العالمي قفلت ولغت الترم لازم الناس تستهتر.
لما وزير التربيه والتعليم عاوز ينزل أزيد من مليون طالب ثانويه الامتحانات يبققاا هنخاف من اي وعلي اي بعد كدا
وفي الآخر صفحات ال facebok كلها نازلة شتيمة في الغلابة ولو الأزمة عدت على خير هتبقى أجهزة الدولة الجبارة نجحت برغم جهل الشعب ولو الأزمة دمرت البلد هيبقى الشعب الجاهل هو السبب !
لما يطلعوا أكبر رجال الأعمال عايزين يموتوا الشعب وأعضاء النواب المحترمين مستخبين عن أهالي دايرتهم ولما يطلعوا المشخصاتية والراقصين ينصحوا الشعب يقعد في البيت ياكل تراب وهما بياخدو ملايين ولعيبة كرة مش عاجبه ١٢ مليون في السنة ونص الشعب مش عارف يصرف ٥٠٠ جنية
أنتم إللى إستهترتوا بأرواح الناس من البداية متجوش تلزقوا بلاويكم في الغلابة ...
#cpd
تعليقات
إرسال تعليق